Нүүр Танилцуулга Мэдээ, Мэдээлэл Зөвлөгөө Зургийн сан Видео Зурхай Сүм хийд Номын тус Хойд төрөл Төсөл Худалдаа
Нүүр « Номын тус
Ерөөлийн хаан /Санжод монлам/
   “Ерөөлийн хаан” бол ерөөл бүгдийн хамгийн дээд хэмээн алдаршсан бөгөөд Бурхан багшийн хамаг судар тарни, Энтэхэг, Төвдийн бүх шидтэн мэргэдийн зохиосон бүх ерөөлийн утга агуулга хураангуйгаар багтсан ерөөл гэдэг. Энэ ерөөлийн судар бол Ганжуурын доторхи “Мод байгуулахуй судар” хэмээх номд Самандбадра бодисадвагийн зохиосон ерөөл юм.
 
   Орон сууцаа цэвэрлээд, бурхан шүтээнээ дэлгээд, ариун тахилыг бэлдэж, амгалант суудалдаа суугаад дотроо бодохуй нь:
    “Олохуйяа бэрх хүний төрлийг олсон, олсон энэ төрөл нь мөнх бусын жамыг үзэх нь магад. Төрөл егүүтгээд зул мөхсөн мэт огт үгүй болохгүй гурван муу заяаны тэсэшгүй зовлонг амсаж болно. Сайн төрлийг оловч, орчлонд байгаа учир эцэс нь хэзээд зовлонгоор дуусдаг” хэмээх зэргээр өөрийн биеэр бодоод, “Миний энэ байдлын нэгэн адилаар надаас бусад амьтан бүгдээрээ муу зүүдний зовлонг ч үл хүсэх, хичнээн их амгаланг амсавч ханах үгүй байх нь амьтан бүрд адил тул эх болсон хамаг амьтанд зорьсон асрахуй сэтгэл ба нигүүлсэхүйн сэтгэлийг сэтгэлдээ үүсгээд гурван эрдэнэд ерөөл явуулж, бодь сэтгэлийг үүсгэх” зэргээр сэтгэлээ номхотгон ижилдүүлж үйлд. 
 
    Ялангуяа эх болсон хамаг амьтны тусын тулд хамгийн түргэнээр бурханы хутагийг олж амьтны зовлонг арилгая. Тэр тухай “Хутагт сайн явдлын ерөөлийн хаан”-ыг уншиж үйлдсүгэй хэмээн сэтгээд сэтгэлдээ санах нь: 
“Арван зүгийн хязгааргүй оронд оршиж байгаа хамаг бурхан бодисадва нарыг оршин заларч байгаа орон, ариун орнуудын хамтаар сэтгэлдээ ив илхэн санаж” байхын дээр өмнө огторгуйд арслант ширээ, лянхуа наран саран дэвсгэрийн дээр өөрийн багшийг гэрэл цацруулан заларч байгаа хэмээн бодоод ерөөлөө уншина.
 
ХУТАГТ САЙН ЯВДЛЫН ЕРӨӨЛИЙН ХААН
 
Арван зүгийн ертөнц бүхэнд
Гурван цагийн орчил тутамд 
Билигт хүний арслан бологсдод
Бие, хэл, сэтгэлээр мөргөе
Гэгээн үйлсийн хүсэл зоригоор
Гэгээрэгч бүхнийг сэтгэлдээ тодруулж
Бий ертөнцийн тоосны тоогоор
Биеэ хувилган, сөгдөн мөргөе
Тоос тутамд тоосны тоотон
Бурхад бодисадвын дунд заларсан
Торолтгүй чанарт номын агаар
Эрхэт ялагчдаар дүүрсэнд биширмү
Эцэс төгсгөлгүй магтаалын далай
Эгшигийн гишүүн далай дуугаар
Ариун Бурхадын эрдмийг дуурсгаж
Амгалан ажирсан бүгдийг магтая
Цэнгэл баяслын дээдийг соёрх
Цэцэг эрих, хөгжим, шүхэр
Гэрэл зул, анхилам хүжисээр
Гэгээн Бурхадад тахил өргөмү
Усан тахил хувцад, гоёл
Уулсын хаан шиг замбалзахуй чимэг
Уран тансгийн дээжис бүхнээр
Ариун Бурхадад тахил өргөмү
Ахуй ертөнцийн энгээс давсан
Агуу гайхамшигийг өргөн бария
Үйлсийн сайнд зорин тэмүүлсэн
Үнэн биширлээр дээдлэн тахия 
Шунал хорсол мунхагт автаж
Бие хэл сэтгэлийн үүднээс
Бишгүй үйлдсэн хилэнц бүхнээ
Би нэгд нэггүй наминчлая
Арван зүгийн Бурхан бодисатва
Сурагч, төгсөгч, шарвааг, брадига
Амьтан бүгдийн сайн буян
Алив бүхнээ даган баясму
Ариусан гийж шуналыг огоорсон
Ахуй ертөнцийн зул бологсдод
Ариун номын алтан хүрдээ
Ашид эргүүлэхийн айлтгал өргөе
Нирваан дүр үзүүлэх таалалтан
Ертөнцийн тоос шиг олон галавт
Амьтан бүхэнд туслан саатахыг
Алгаа хавсран гуйн залбирая
Мөргөн тахиж гэмшин наминчлаад
Даган баясч айлтган залбиснаар
Аль хураасан буян бүхнээ
Ариуслын дээдэд зориулая би
Эрт заларсан, эдүгээ оршигч
Арван зүгийн Бурхадыг тахия
Ирээдүйн Бурхад ч үтэр түргэн
Эгээрлээ гүйцээж гэгээрэх болтугай
Арван зүгийн хамаг орон
Асар үлэмж ариун болоод 
Бодь модноо морилсон Бурхад
Бодисатва нараар дүүрэх болтугай
Арван зүгийн амьтан бүхэн
Ашид өвчингүй амар жаргаад
Ариун номын үйлс бүгд нь
Ая зохисоор сэтгэлчлэн бүтэг
Гэгээрлийн замаар би замнаж
Урьд төрлөө марталгүй санаж
Гэрээ орхисон үнэний эрэлд
Төрөл тутамдаа гарах болтугай
Агуу гэгээрэгсдийг даган суралцаж
Ариун явдлыг төгс цогцлооё
Ёс суртлыг дээдлэн сахиж
Ёс бусыг хэзээд цээрлэе
Тэнгэр лус, ягчисын хэл
Хүн бус, болон хүний хэл
Аливаа төрөлхтөн бүхний хэлээр
Ариун сургаалыг заасугай би
Эрхэм дээд зорилгоо марталгүй
Элбэрэл журмыг ямагт хичээе
Эрдэм үйлст минь саад бологч
Элдэв гэмийг эгнэгт арилгая
Нар сар огторгуйд торохгүй
Лянхуа цэцэг усанд хиртэхгүй шиг
Шуналын буртаг, шулмын үйлээс
Амьдралын тойрогт ангид явсугай
Аль ч зүг, хаа ч газарт
Амьтан бүхэнд туслан явж
Аюул зовлонгоос авран тэтгэе
Амар амгаланд хөтлөн хүргэе
Ирэх цагийн галав тутамд 
Эрхэм сайн үлгэр дууриалаар
Бусдын явдал үйлд тааруулан
Буянт үйлсийг төгс бадраая
Адилхан санаа зориг өвөрлөсөн
Ариун нөхөдтэй би нөхөрлөж 
Бие хэл сэтгэл гурваар
Ерөөл үйлсээ нэгтгэх болтугай
Өмөг түшиг болсон нөхөд
Үйлсийн оргилд дуудсан багш нартай
Үргэлж би учрах бүртээ
Өгөөмөр сэтгэлийг нь гутаахгүй байя
Ариун Бодь сэтгэлтнүүд хүрээлсэн
Авралт Бурхадыг илхэн үзэж
Айсуй цагийн галав тутамд
Агуу их тахил өргөе
Богд мэргэдийн номыг эзэмшиж
Бодь явдлаар хотлыг гийгүүлж
Эрхэм дээд ариуслыг эдлэн
Ирээдүйн галав бүхнийг туулсугай
Эргэх хорвоогийн орчил бүхэнд
Ээл буян суу заль
Эрдэм ухаан бясалгал гэгээрлийн
Эгнэшгүй баян сан болтугай
Хумхи тутам хумхийн тоотон
Орон бүгдэд сэтгэшгүй Бурхад
Бодисатва нарын дунд заларсныг
Бодь хутгийн замналаар нээсүгэй
Хязгаар мухаргүй зүг бүхэнд
Хялгасны энд гурван цагийн 
Далай Бурханд далай орнуудыг
Далай галавт үзэн зорчсу
Үг бүр нь далай мэт
Үлэмжийн чанар төгс аялгуу
Бусдын сэтгэлд зохицон нэвтрэгч
Бурханы зарлигийг ямагт сонсомуу
Цаг цагийн гэгээрэгсэд бүхий
Цаглашгүй эргүүлсэн номын хүрдний
Оюун баялаг эгшиглэн сургаалд
Ой ухааны хүчээр нэвтэрсүгэй
Ирэх цагийн галав бүхэнд
Эгшин зуурт би ороё
Гурван цагийн галав эринийг ч 
Агшин төдийд би туулая
Гурван цагийн хамаг Бурхадыг
Ганц агшинд зэрэг тольдож
Эгнэгт тэдний эдлэх цэнгэлд
Илбэт чанарын бясалгалаар уусая
Гурван цагийн ариун ордыг
Нэгэн хумхын дээр байгуулж
Орь Бурхадын дагшин орноор
Орон зай бүхнийг дүүргэе
Ирээдүйн ертөнцөд зул бологсод
Гэгээрлийг олж сургаал айлдаж
Амирласан нирваан дүр үзүүлэхэд
Авралт тэдний дэргэд байя
Хамгийн хурдан хувилгаан хүч
Хамгийн үүд хөлөгдийн хүч
Хамгийн эрдэмт явдлын хүч
Хамгийн түгээмэл асрахуйн хүч
Хамгийн сайн буяны хүч
Харилтгүй бэлгэ билгийн хүч
Арга билиг самадийн хүчээр
Ариун гэгээрлийн хүчийг эзэмшие
Үйлийн хүчийг огоот арилгаад
Нисваанисын хүчийг оргүй дараад
Шулмын хүчийг үгүй болгосноор
Сайн явдлын хүчийг цогцлоосугай
Далай мэт орныг гийгүүлж,
Далай мэт амьтныг аварсугай
Далай мэт номыг судалж
Далай мэт билигийг нээсүгэй
Далай мэт явдлыг ариусган
Далай мэт ерөөлийг төгсгөж
Далай мэт Бурхадыг тахин
Далай мэт галавыг туулсугай 
Алимад гурван цагийн Бурхадын
Ариун замнал ерөөл бүхнийг
Агуу сайн явдлаар гэгээрч
Алдалгүй би гүйцэтгэх болтугай
Ялгуусан бүхний ахмад хөвгүүн
Яруу алдар нь Самандбадраа
Эрдэмт түүнтэй ижилсэхийн тулд
Эл буянаа сайтар зориулая
Бие хэл сэтгэл болон
Үйлс оршихуй бүгд нь ариуссан
Билгүүн сайн ерөөлч түүнтэй
Би ч бас адилхан болтугай
Эрдэм дээд явдлын тулд
Итгэлт Манзуширийн ерөөлийг тавьж
Ирээдүйн галав тутамд уйсалгүй
Эгээрсэн зүйлсийг нь төгс гүйцээе
Үйлс замнал минь цаглашгүй болоод
Суу заль минь хэмжишгүй болтугай
Эгнэх аргагүй замналд оршсон ч 
Эрдэм чадал бүхнийг эрсүгэй
Огторгуйн хязгаар хаа хүрнэ
Орчлонт ертөнц тэнд ч оршино
Зовлон төөрөгдөл хаа байна
Зориг эрмэлзэл минь тэнд ч хүрнэ
Арван зүгийг эрдэнэсээр дүүргэж
Ахуй цэнгэлийг хотлоор бүрдүүлж
Хумхийн тоос шиг олон галавт
Хутагт бурхадад өргөл болгосноос
Ерөөлийн хаан судрыг сонсч
Гэгээрлийн дээд хутагийг мөрөөсч
Буурашгүй сүсгийг нэгэнтээ төрүүлбэл
Буяны дээд нь энэ л болноо
Хэн ч бай ингэж ерөөвөл
Хэзээд муу төрөлд уналгүй
Хилэнцэт нөхдөөс ч ангижрах бөгөөд
Хязгааргүй гэрэлт Бурханыг үзнэ
Эрхэм олзыг тэд эзэмшиж
Энэ насандаа ч амар жаргаад
Самандбадраа ямар мэтчилэн
Сааралтгүй түргэн түүн шиг болно
Үүнийг ухаараагүй хэн нэгэн
Үйлийн таван адгийг үйлдлээ ч 
Үнэн сэтгэлээс ийнхүү ерөөвөл
Өнөөх нүгэл нь төдхөн арилна
Ухаан билиг, бие бялдар
Угсаа язгуур төгөлдөр болоод
Хар хорын хүчинд дийлдэлгүй
Хамаг гурван ертөнцөд шүтэгдэнэ.
Ариун бодь мод руу явж
Амьтны тусд тэнд суугаад
Аюулт шулмын хүчнийг ялж
Ариусан гэгээрч үнэнийг номлоно.
Энэ сайн явдлын ерөөлийг
Эндүүгүй тогтоож уншиж заавал
Эцсийн үрийг нь Бурхан л болгооно
Эргэлзэх хэрэггүй дээд гэгээрэлд
Баатар Манзушир хэрхэн тольдсон
Самандбадраа ч түүнчлэн ерөөсөн
Агуу тэднийг үлгэрлэн дууриаж
Ариун үйлсээ өнөд залуурдая
Гурван цагийн Гэгээрэгч бүгд
Ерөөлийн хаанаар өргөмжилсөн тул
Энэ бүх буяны үндсээ
Эрхэм сайн замналд зориулая
Энэ нас минь эцэслэх үед
Элдэв түйтгэр бүхнээ ариусгаад
Эгнэшгүй гэрэлт Бурханыг үзэж
Энхжингийн оронд одсугай би
Тэнгэрлэг дээд ерөөл хүсэл минь
Тэнд хүрэхэд оргилон ундарч
Орчлон хэдий орших хугацаанд
Олон амьтанд туслан явсугай
Амар амгалан Бурханы оронд
Ариун лянхуа цэцгээс мэндлэхдээ
Авид Бурханаас гэгээрлийн бошгыг
Аяа би хүртэх болтугай
Орь дээд бошгыг олоод
Олон сая хувилгаан дүрээр
Оюун билигийн суу хүчээр
Орчлон дахинд гэгээрлийг түгээе
Сайн явдлын ерөөлийг тавьснаар
Сая миний хураасан буянаар
Амьтан бүгдийн ч ерөөл буян
Агшин зуурт бүтэх болтугай
Зориг эрмэлзлийн ариун сайхан нь
Зол буяны дээдийг соёрхоно
Зовлонд живэгсэд түүний хүчээр
Зохист Авидын орныг олтугай
Сайн ерөөлийн хаан судар
Сааршгүй тусыг даянд бүтээж
Самандбадрын үйлс дэлгэрч 
Шаналал зовлон устах болтугай
 
 
Уншсан: 2802
Сэтгэгдэл бичих
Уншигчдын бичсэн сэтгэгдэлд BUDDA.mn хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.
Сэтгэгдэлтэй холбоотой санал гомдлыг 70111922 утсаар хүлээн авна.
Таны нэр:
Таны сэтгэгдэл:
Сэтгэгдэлүүд Нийт: 143
123456789101112131415161718
Бусад цэс
This text will be replaced
Реклам, сурталчилгаа
РЕКЛАМ СУРТАЛЧИЛГАА
240 x 250px
2008-2015 © Будда.мн, Хөгжүүлэгч DzCMS